74 na nasikop sa drugas sa Mandaue

CEBU, Philippines - Ningkabat na sa 74 ka tawo ang nasikop sa kapolisan sa dakbayan sa Mandaue nga nalambigit sa paghupot ug pagpayuhot sa ilegal nga drugas sama sa shabu ug marijuana sa 52 usab ka operasyon sulod lang sa lima ka buwan ning tuiga.

Kini ang nasayran sa Banat News gikan kang Senior Supt. Petronelli Baldebrin, direktor sa Mandaue City Police Office.

Matud niya nga labing daghan ang mga nalambigit sa ilegal nga kalihukan sa niaging mga buwan itandi sa unang lima usab ka buwan sa miaging tuig nga dunay 66 ang nadakpan sa 55 ka operasyon.

Gitataw ni Baldebrin nga labing daghan usab ang shabu nga ilang nasakmit sulod sa lima ka buwan nilang operasyon karong tuiga sanglit mokabat man ang kantidad sa market value ngadto sa P549,054.00 samtang sa tuig 2013 sa unang lima ka bulan nilang operasyon mokabat lamang sa P177,462. Niadtong Huwebes dugang duha ang nasikop kinsa nasakmitan usab og armas ug shabu sa sitio Sudlon, Maguikay, dakbayan sa Mandaue.

Ang nadakpan mao sila si Eddie Boy Abear Suico, 21, ug Jerry Alilin Talaugon, 27, taga Purok Lemonsito, Umapad, sa maong dakbayan nga unang gi-alarma sa mga molupyo nga armadong mga tawo.

Matud ni PO3 Antonio Descartin sa Presinto 4 sa MCPO nga si Suico dihang ilang nasikop ilang nasakmitan og usa ka Black Widow nga kalibre .22 revolver magnum ug duha ka paketeng shabu.

Samtang si Talaugon dihang nasikop maoy ilang nasakmit ang duha ka paketeng shabu, tinfoil ug usa ka disposable lighter.

Dugang ni Descartin nga nakadawat sila og tawag sa telepono gikan sa usa ka concern citizen nga nagpahibawo labot sa tawo nga ilang namatikdan nga nagdala og armas.

Dihang gihimo nila ang pakisusi sa maong dapit maoy ilang naabtan ang duha nga sila si Suico ug Talaugon nga mitakdo usab sa gihulagway nga armadong mga tawo sa maong dapit hinungdan nga ilang gidakop. (/GMR)(BANAT NEWS)