Gunman ni king maoy moila sa mastermind
CEBU, Philippines - Target karon sa mga imbestigador ang pagsikop sa gunman nga mipatay sa negosyanteng si Richard King didto sa Davao City tungod kay pinaagi niining tawhana matultolan nila kun si kinsa ang nagsugo pagpapatay sa maong negosyante. Sa case conference nga gihimo sa Police Regional Office-7 kagahapon, mitambong ang nagkalain-laing unit sa PNP gikan sa Region 6, 7 ug Davao region diin ilang gituki ang maong kaso.
Diha usab si Deputy Chief for Administration Director General Felipe Rojas kinsa mipasidaan sa mga sakop nga gimando ni Presidente Benigno Aquino III nga ipasulbad gyud ang mga high profile cases sa nasud sa labing daling panahon.
Gidugang ni Rojas nga gisubay nila karon mao ang focus of interest sama sa nahitabong giingong “land grabbing†sa Boracay, mga negosyo ni King ug lakip na ang personal niining kinabuhi. Bisan pa man og adunay cartographic sketch sa gunman nga gipagawas ang PNP apan ang kapulisan miingon nga sutaon gyud nila kun unsa nga grupo ang nagpaluyo sa kamatayon sa business tycoon.
“Behind that gunman there is a mastermind yun ang tinitingnan natin,†matud ni Rojas
Wa usab gisalikway sa kapulisan nga adunay kakunsabo ang suspek nga mihimo sa krimen ilabi na matud pa wa masayod ang pamilya sa biktima nga didto kini sa Davao.
Gihulagway usab ni Rojas nga dako og matabang ang P1.3 milyones nga reward money hinungdan miapelar kini sa publiko nga makig-alayon nila kun adunay kasayuran sa nahimutangan sa suspek.
Way gihatag nga time frame ang kapulisan labot sa kasulbaran sa kaso ni King apan malaumon sila nga sa labing daling panahon masulbad kini.
Nangita na karon ang PNP og mga saksi nga makahatag og dugang impormasyon mahitungod sa nahitabo ug ang mga na-recover nga empty shell ug slugs i-match sa ilang ballistics information system aron pagsuta kun gigamit ba usab kini sa ubang mga krimen. (BANAT NEWS)
- Latest
