Babayeng ‘pusher’, bisita gisikop
CEBU, Philippines - Nasikop sa kapolisan ang babayeng drug pusher ug bisita atol sa buy-bust operation sa Pusok, dakbayan sa Lapu-Lapu niadtong Martes sa gabii.
Ang nasikop mao sila si Evelyn Berame Booc, 32, ug Girlie Ducay Omolon, 24, pulos dalaga nga nagpuyo sa maong lugar.
Gipangulohan ni Senior Insp. William Cordova sa Station 5, natigayun ang buy-bust operation pinaagi sa P400 nga buy-bust money nga gipalit sa drugas kang Booc.
Nakuha gikan ni Booc ang duha ka gagmay’ng pakete sa shabu nga maoy gitunol ngadto sa police decoy ug laing 18 ka gagmay’ng pakete.
Laing gitunolan og marked money sa police decoy mao si Mark Joniel Gestat Cabarse, 28, minyo apan nakasibat.
Si Omolon nga diha sa dapit atol sa operasyon ang lakip sa gisikop.
Matud ni Cordova nga daghang reklamo batok sa mga suspek hinungdan nga ilang gipahigayon ang buy- bust operation uban sa pagtugot sa Philippine Drug Enforcement Agency.
Si Booc nipadayag nga napugos siya sa pagpamaligya og shabu aron ikasuporta sa iyang mga anak nga nagtungha ug hapit na makahuman sa iyang kurso.Ang mga suspek gidala sa Lapu-Lapu detention cell samtang padayong gipangita sa kapolisan si Cabarse. (BANAT NEWS)
- Latest
