Gipusil nalup-og gitiwasan

CEBU, Philippines - Nagtoo ang kapolisan nga grabe ang kalagot sa nipusil patay sa usa ka tawo sa sityo Tingkahon, Bankal, dakbayan sa Lapu-Lapu kagahapon sa buntag.

Ang biktima nga si Ritchel Sotsot Madera, 33, minyo nga nagpuyo sa Camella Homes sa maong lugar ug trabahante sa U-Freight gipusil lima ka higayun sa wala pa mailhing mamumuno.

Sa pasiunang imbestigasyon nilang SPO2 Manolito Abellanosa ug PO2 Jerson Alparito nasayran nga sayong nag-atang si Madera sa gate sa subdivision aron mosakay sa sakyanan sa iyang manager sa trabaho nga molabay alas 7 sa buntag matag adlaw.

Duha ka tawo miduol kinsa kalit namusil sa likod nga bahin ug sa dihang nalup-og na si Madera giingong gitiwasan og pusil lima ka higayun hinungdan sa kamatayon.

Matud ni Abellanosa nga ang paagi sa pagpamusil nagpakita sa grabeng kasuko ngadto sa biktima. Apan ang inahan sa biktima hugot nga nihimakak nga dunay nasuko o gikaaway ang iyang anak ug kanunay kining busy sa trabaho.

Samtang usa ka lalaki ang gipusil patay sa wala mailhing tawo samtang natulog sa lingkuranan niadtong Lunes sa gabii sa El Filibusterismo, Warwick Barracks, Ermita, dakbayan sa Sugbo.

Ang biktima nailhan nga si Pamilito Jumao-as, 41, taga sityo Katsilaan sa maong lugar. 

Ang mamumuno daling nisibat sakay sa motorsiklo ug padayon pang gipangita sa kapulisan. (BANAT NEWS)