Namusta og hantak gipusil patay

CEBU, Philippines - Patay ang usa ka 29 anyos nga lalaki human pusila samtang namusta og hantak sa Barangay Tapul, dakbayan sa Talisay sa miaging kadlawon.

Si Joel Cabayles, adunay kapuyo ug taga sitio Catican sa maong barangay giingong nitambong sa sugalan dihang giduol sa suspek kinsa kalit nipusil kaniya sa duha ka higayun sa iyang buko-buko pasado alas 2:30 sa buntag.

Daling gidala sa Talisay District Hospital si Caballes apan gideklarar nga patay na paghiabot sa tambalanan.

Nakuha sa crime scene ang duha ka slug jackets sa wala pa matino nga kalibre sa armas.

Si PO2 Edwin Campomanes, mibutyag nga adunay nakalalis ang biktima buntag sa niaging adlaw sa buwangan apan na-settle ra kini.

Ang kapulisan padayon pa nga misubay kung si kinsa ang nakalalis sa biktima alang sa imbestigasyon.

Nasuta usab nga nalambigit sa pagpanunggab ang biktima sa lungsod sa Minglanilla apan matud pa sa kapuyo nga na-settle ra usab ang kaso.

Ang kapulisan padayon pa nga miimbestigar sa maong kaso aron sa pag-ila sa mamumuno. (/GMR)(BANAT NEWS)