Safety training ipahigayun sa DOLE

CEBU, Philippines - Gimandoan sa ulohang buhatan sa Department of Labor and Employment (DOLE) ang ilang rehiyonal nga mga opisyal sa pagpahigayun og safety trainings sa mga construction workers. Kini human sa usa ka aksidente sa Barangay Langtad, dakbayan sa Naga diin usa ang nakalas samtang tulo ang naangol. Ang pagpahigayun sa safety training ubos sa pagpakigtambayayong sa Employees’ Compensation Commission (ECC) ug Occupational Safety and Health Networks (OSHN).

Gitumbok sa DOLE ang kakuwang sa kahibawo sa mga trabahante sa luwas nga trabaho ang hinungdan sa mga aksidente.

Ang kadaghang konstruksiyon sa pagkakaron giingong nakapabulahan kaayo sa mga trabahante. Nunot niini ang DOLE-7 gitahasan sa pag-monitor sa construction industry mahitungod sa paghatag og kaayohan sa mga trabahante. (Lilibeth Ambayec-CNU-Intern/GMR)

Nanghagit away gipusil patay

Patay ang usa ka tawo nga nanghagit sa iyang silingan og away nga mano-mano gamit ang kutsilyo apan napusilan na hinoon nga maoy nakaingon sa hinanaling kamatayon.

Ang insidente nahitabo niadtong Sabado sa hapon sa Barangay Pandan, dakbayan sa Bogo.

Ang biktima nailhan nga si Junnel Gomez, 30 samtang ang suspetsado giila nga si Arvin Logera, 34, taga Pedro Compound, Barangay Gairan, sa maong dakbayan.

Nasuta nga gikaaway sa biktima ang amahan sa suspetsado sa wala pa masayri nga hinungdan.

Ang biktima niadto sa balay sa suspek dala ang kutsilyo apan ang amahan sa suspek armado og wala matino nga kalibre sa armas nga maoy gigamit sa pagpamusil.

Ang biktima nga naigo sa dughan dali untang gihatud sa Bogo District Hospital apan gideklarar kini sa mga doktor nga dead on arrival.

Gikataho nga nitahan na ang suspek ngadto sa kapolisan ug kasamtangang gibalhug sulod sa bilanggoan. (BANAT NEWS)