Magsuon nagtinigbasay usa patay

CEBU, Philippines - Patay na nga nalandig sa Cebu City Medical Center ang usa ka 50 anyos nga biyudo nga nakaangkon og daghang samad tinigbasan sa nagkadaiyang parte sa kalawasan human siya gitagod og tigbas sa iyang igsuong babaye nga una niyang gitigbas.

Ang insidente nahitabo niadtong Huwebes sa gabii diha sa Sitio Baksan, Barangay Sapangdaku ning dakbayan sa Sugbo.

Ang biktima giila nga si Christobal Fernandez Ragasajo, samtang suspek mao ang magtiayon nga sila si Gina Ragasajo Bontilao, 42, manghod sa biktima, ug ang bana niini nga si Joel Sabillo Bontilao,45.

Sumala pa ni SPO4 Rey Cuyos ang imbestigador sa Homicide Section sa Cebu City Police Office hubog nga misulong si Ragasajo sa balay sa iyang manghod niadtong orasa nga nagdala og  sundang ug mihagit sa iyang bayaw sa pag-ingon, “gawas diha pre kay patyon tika.”

Matud pa kalit nga misulod sa koral sa balay sa mga suspek ang biktima hinungdan nga gibagat kini ni Joel apan gitigbas kini dayon ni Ragasajo maayo na lang nga nasagang kini og kahoy.

Tungod niini, mipatunga ang igsuon nga si Gina apan gitigbas kini og apil diha sa bukton. Tungod sa gibuhat sa biktima, misulod sa ilang balay si Gina ug mikuha og sundang ug gibalikan dayon gitagodtagod og tigbas ang maguwang.

Dali nga miresponde ang mga barangay tanod nga sila si Wilmer A. Bascon ug Alexander Ragasajo ug ilahang gidala sa tambalanan ang mga samaron apan patay na gyud si Christobal tungod sa mga samad nga naangkon niini sa iyahang ulo ug sa nagkalain-laing bahin sa lawas.

Samtang ang iyang manghod nga si Gina ang gipatambalan sab gumikan sa iyang nadawat nga samad tinigbasan.

Nakuha sa kapolisan diha sa crime scene ang duha ka sundang nga aduna pa’y lama sa dugo ug ang kahoy nga gigamit sa bana sa iyang manghod. Padayon pa ang imbestigasyon sa maong kaso apan giingong dugay nang dili maayo og relasyon ang managbayaw. (/EIM)(BANAT NEWS)