Nangluod sa pamilya naghikog

CEBU, Philippines - Usa ka tawo ang napalgang nagbitay na ug wala nay kinabuhi sud sa iyang lawak sa gipuy-ang panimalay sa Sitio Sudtungan, Barangay Basak, dakbayan sa Lapu-Lapu kagahapon sa kaadlawon. Gituohang naghikog si Roberto Baldesamo Solon, 35, residente sa maong dapit. Sa imbestigasyon ni PO3 Winston Ybañez ug PO1 Jomar Florentino sa Crime Against Persons Desk, ang asawa sa namatay nga Freny mibutyag nga nianang gabii sa adlaw nga Sabado  nag-inom silang duha  sa iyang bana.

Matud pa nga gisuginlan siya niini nga nahiubos siya sa iyang pamilya tungod kay dili na maayo ang pagtagad nila kaniya.

Human niadto, gikatahong mibarog si Solon ug misulod sa ilang lawak ug pipila ka gutlo adunay milagubo sud sa lawak ug sa pagsusi pa nila nagbitay na kini  gikan sa wire sa kuryente nga gihigot ang tumoy sa ibabaw nga bahin sa ilang lawak. Gisuwayan og luwas sa guwardiya sa maong subdivision si Solon ug gidala sa Mactan Doctors Hospital apan gideklarar kini nga patay na sa mga doktor.(/EIM)(BANAT NEWS)