USB nga nasakmit sa kapolisan gikan sa photographer gisusi

CEBU, Philippines - Giimbestigar karon sa kapolisan kung diing mga lugara gikuhaan og video ug pictures sa na-entrapped nga freelance photographer nga nakita sa nakompiskar gikan kaniya nga USB. Ang maong freelance photographer nga si Jaypee Corilan nadakpan sa usa ka entrapment operation human gireklamo sa usa ka 20-anyos nga single parent tungod sa pagpangilad kaniya dihang gikuhaan siya niini og litrato nga way sapot apan wa mobayad sa ilang sabot.

Si Lapu-Lapu City OIC Police Office Director Sr. Supt. Armando Radoc sa pakighinabi sa Banat News miingon nga ilaha na karong gisusi kung kinsay tag-iya niadtong swimming pool nga dunay daghang mga naghubo nga kababayen-an. Sumala pa ni Radoc nga ang mga tag-iya sa maong pool posibleng ilang makasohan.

Hinuon giklaro ni Radoc nga ang motel diin nasikop si Corilan walay tulubagon gumikan kay usa kini ka motel ug pulos mga legal age ang biktima ug ang suspetsado ug wala kini masayod sa ilang gibuhat sud sa maong lawak.

Samtang si Sr. Insp. Rogelio Pineda sa CAIDSOTG ug  Insp. Judith Besas sa Women’s and Children’s Protection Desk pormal nang mipasaka og kaso batok ni Corilan ngadto sa piskaliya kagahapon.

Kasong kalapasan sa RA 9208 o Anti Human Trafficking in Persons Act ug RA 9995 o Anti Photo and Video Voyeurism Act of 2009. Samtang ang biktima wala na sa kustodiya sa social workers sa dakbayan sa Lapu-Lapu gumikan kay usa na kini ka legal age.

Giawhag ni Pineda ang ubang posibleng nabiktima ni Corilan sa pagdangop sa ilang buhatan aron malakip kini sa pagpasaka og kaso batok sa suspetsado.  (BANAT NEWS)