Pusher nadakpan sa motel

CEBU, Philippines - Nasikop sa kapolisan ang gidudahan nga drug pusher sulod sa usa ka motel sa Tumulak Compound, Barangay Pajo, dakbayan sa Lapu-Lapu kaniadtong Miyerkules sa hapon.

Ang nadakpan sa buy-bust operation mao si Willy Donaire, hingkod ang panuigon ug nagpuyo gihapon sa Barangay Pajo. Si Senior Inspector Rogelio Pineda Jr. miingon nga pipila ka molupyo sa maong dapit ang mitaho kanila nga adunay mamaligya og illegal nga drugas sulod sa motel.

Matud sa inpormer nga nakahasol kaayo kanila nga mga molupyo sa maong dapit ang kasaba sa mga tawo nga mamalitay og gidili nga drugas ug nabalaka sila kay sila mga adis-adis.

Gipanid-an sa mga polis ang kalihukan sa giingong mga tigbaligya og gidiling drugas sulod sa maong motel.

Dihang nasuta nila nga positibo ang inpormasyon, nasabotan ang pagpahigayon og buybust operation sa mga sakop sa City Anti-Drugs Special Operations Task Group ug misangpot sa pagkasikop ni Donaire.  Nasakmit gikan ni Donaire ang lima ka pakete nga shabu ug kagamitan paghingos og shabu nga gibanabana nga mokantidad og P150 mil.  (BANAT NEWS)