Lima ka kawatan nasikop

CEBU, Philippines - Nadakpan ang duha ka suspetsadong tulisan nga nanulis og taxi sa sitio Landing, barangay Catarman, lungsod sa Liloan kagahapon sa kaadlawon.

Ang nadakpan mao sila si Rodel Barbero, 34, taga barangay Umapad, dakbayan sa Mandaue, nga usa ka gwardiya sa usa ka establisamento sa barangay Pajo sa dakbayan sa Lapu-Lapu ug Robert Rodriguez, 26.

Si PO3 Jesson Gayo miila sa biktima nga si Mario Clarin, 50, taga Bacayan, dakbayan sa Sugbo. Giingong ang mga suspetsado misakay sa biktima gikan sa barangay Paknaan, Mandaue ug nagpahatud sa lungsod sa Liloan apan pag-abot diha sa lugar kalit lang gitionan og armas sa mga suspetsado ang biktima ug gikuha ang P2,700 nga kita niini.

Ang biktima milayat kini gikan sa taxi ug midagan ug maayo na lang nga  nasugatan niya ang nagpatrolya nga mga polis ug nakapangayo og panabang.

Nasugatan sa mga polis uban sa biktima ang mga suspetsado hinungdan nasikop ang duha ug nakuhaan og  usa ka kalibre .38 nga pusil nga dunay tulo ka  bala apan wala na ma-recover ang kwarta.

Sa laing bahin, tulo ka lalaki nga mga miyembro sa “Laglag Barya Gang” nga nibiktima og usa ka menor de edad nasikop sa kapolisan atol sa follow-up operation nga gipahigayon niini sa M.J. Cuenco Avenue, Villagonzalo II, barangay Tejero, dakbayan sa Sugbo.

Ang mga nasikop naila nga si Felix Viodor, 40, taga Tabunok sa dakbayan sa Talisay, Alex Andes, 40, taga barangay Mohon, Talisay; Jhon Recentes, 26, taga Pooc, Talisay. Base sa imbestigasyon sa kapolisan sa Waterfront Police Station nga nagpa-blotter ang usa ka 14-anyos human ang nakamatngon nga nahanaw na iyang cellphone sa iyaha nang pagkanaog diha sa barangay San Roque.

Nakahinumdom siyang dunay mga sensilyong natagak sa gisakyang jeepney nga iyang gipamunit ug gihatag sa kaubang pasahero. Sa iyang pagpahibalo sa kapolisan  diha niya nasayran nga modus kadto sa laglag barya.

Daling gigukod sa mga polis ang PUJ nga gisakyan sa biktima ug  diha  pa gihapon ang mga suspek hinungdan nga sila gidakop ug nabawi kanila ang cellphone sa biktima.  (BANAT NEWS)