Usa angol pagrapido

CEBU, Philippines - Usa ka lalaki ang naangol human sa nahitabong pagpangrapido diha sa ilang boarding house pasado ala-una sa kaadlawon kagahapon diha sa sitio Basbas, Pagsabungan, dakbayan sa Mandaue.

Ang biktima mao si John Dever Alin, 25, nagpuyo sa maong dapit nga nakabaton og samad pinusilan sa iyang paa ug kamot  ug nalandig sa Eversly  Child Sanitarium General Hospital.

Ang nurse sa maong tambalanan maoy mi-report sa kapolisan kabahin sa usa ka lalaking nabiktima sa pagpamusil.

Ang mga silingan sa biktima mihulagway nga usa ka wala mailhing lalaki nga kasarangan ang pamarog ug gidak-on sa panglawas ang mirapido sa boarding house sa biktima.

Si SPO1 Antonio Cabisarez sa kapolisan sa Presinto 3 sa Mandaue City Police Office (MCPO) mibutyag nga gikan  nakig-inom sa iyang mga silingan si Alin ug human sa ilang panag-inom mipauli kini ug natulog apan mao na lay namat-an sa biktima ang buto sa armas ug  natusak sa mga bala ang bungbong sa ilang  boarding house. Si Cabisarez miingon nga ang biktima namalibad nga duna siya’y nakaaway nga posibleng hinungdan sa pagpamusil. (BANAT NEWS)