Gitulis nangurog sa kahadlok

CEBU, Philippines - Nagkurog pa sa kahadlok ang tulo ka call center agent nga gitulis sa duha ka wala  hiilhing   lalaki nga kasakay  nila  sa  PUJ didto sa  dalan A.S. Fortuna sa barangay Banilad sa dakbayan sa Mandaue ala 1:00 pasado ang takna sa miaging kaadlawon.

Ang mga  biktima  mao sila si Carin Lopez, 21, taga Maguikay, dakbayan sa Mandaue, Maricel Sollano, 40, taga Basak sa maong dakbayan ug Demetrio Ochea, 23, nga taga barangay Basak, dakbayan sa Lapu-Lapu.

Si SPO3 Antonio Descartin sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan mibutyag  nga gikan pa sa Talamban, dakbayan sa Sugbo ang namasaherong multicab  nga giluwanan sa mga biktima padulong sa Highway Seno sa dakbayan sa Mandaue.

Matud pa ni SPO3 Descartin nga sa  pag-abot nila  sa A.S. Fortuna, sa barangay Banilad,  kalit  lang  milanit   og armas de fuego  ang  duha  ka  lalaki  ug gition kini ngadto kanila ug mipahibalong tulis.

Gikuha sa duha ka tulisan ang ilang mga cell phone ug pitaka nga wala matino ang kantidad nga sulod niini.

Human  makuha  ang  maong  mga  butang    nanganaug  dayon  ang  maong  mga  tulisan  ug yano  kining nanglakaw pahilayo sa maong lugar.

Si SPO3 Descartin miingon nga mihimo  dayon  sila og  hot pursuit operation, diin  gipakuyog  nila  ang  mga biktima sa pag-ila unta sa duha ka mga  tulisan apan wala na kini nila igkita sa maong dapit. Padayon  gihapon  ang  kapolisan sa pagpangita sa maong  mga  tulisan. (/WC)(BANAT NEWS)