Substandard nga material di na ipagamit

CEBU, Philippines - Gipaniguro  sa Malacañang nga dili magamit ang mga substandard nga puthaw ug ubang materyales sa mga gitukod nga mga edipisyo  sa  mga  lugar  nga naigo sa kalamidad.          

Sumala  ni  Elvira Bongosa  sa Philippine  Information Agency (PIA)7  nga sa sayo  pa nabaniog   ang  mga  taho  nga  substandard  o gagmay ra  ang  mga puthaw  nga  gidapat  sa  mga  edipisyo nga  gipanukod  sa mga  lugar  nga  naigo  sa bagyong  Yolanda.        

Matud  pa  ni Bongosa  nga  isip pagmatuod niini gipahayag mismo  sa Philippine Iron and Steel Institute (PISI)    nga  daghang mga edipisyo ang nangalusno sa magnitude 7.2 nga linog sa Bohol ug sa bagyong Yolanda sa Eastern Visayas tungod   kay gagmay  ra  ang  mga puthaw nga gipanggamit niini.        

 Mitug-an  usab  si  Bongosa  sa gipahayag  ni  Presidential Communications Operations Office (PCOO) Sec. Sonny Coloma,   nga  dili kini  tugotan  karon sa Department of Public Works and Highways (DPWH) tungod kay hugot   na nga gipatuman sa gobiyerno ang mga sumbanan aron lig-on ang mga edipisyo nga ipatukod  sa Bohol ug Eastern Visayas.         

Midugang si  Bongosa   nga tumong  sa  DPWH   nga  mahimong ‘disaster resilient’ ang mga edipisyong ipatukod  karon.      

Matud  niya nga  gipatuman  pagkahuman  sa  linog sa Bohol ug   sa  mga   lugar nga naigo sa bagyong Yolanda,” matud pa ni Bongosa.  (BANAT NEWS)