Masyador nga lolo arestado tungod sa drugs

CEBU, Philippines - Usa ka lolo nga masyador sa buwangan ang nasikop sa mga polis human kini giingong namaligya og ginadiling drugas niadtong Martes sa hapon sa sitio Kilawan, barangay Tanke, dakbayan sa Talisay. Ang suspetsado mao si Fernando Gabison, 62-anyos residente sa maong dapit nagtingkagol sa Talisay City detention cell ug gikatakdang pasakaan og kasong kalapasan sa Akta Republika 9165 kon “Dangerous Drugs Act Law.”

Na-recover sa mga polis gikan kang Gabison ang 23 ka triangular transparent plastic sachet sa shabu nga gisulod sa usa ka rectangular nga container. Si Inspector Rogene Fudotan uban nila ni SPO1 Edgar Causon, SPO1 Benjamin Sebellita, SPO1 Isaias Cabuenas, PO3 Rey  Bucao, PO3 Ferdinand Pablo, PO3 Benedicto Lasque ug PO2 Esmer Gahi mipahigayon og detective patrol sa nahisgutang lugar nga hinungdan sa pagkasikop sa suspetsado.

Si Gabison nga nahinabi sa Banat News mibutyag nga usa siya ka masyador sa buwangan ug duha pa lang siya ka buwan nga namaligya og ginadiling drugas nga mao usab ang iyang gisuporta sa iyang pamilya. Dugang niya nga unang higayon pa siyang nadakpan sa mga polis. (BANAT NEWS)