Trak natagak sa pangpang

CEBU, Philippines - Patay ang tulo ka tawo apil ang usa ka bata samtang 37 ka tawo ang naangol human kini natagak sa pangpang tungod kay nasaghiran kini sa laing cargo truck nga misuway og overtake diha sa barangay Ilihan sa lungsod sa Tabogon sa alas 8:00 kagahapon sa buntag.

Ang patay naila nga sila si Juvelyn Puebla, 20, molupyo sa Caduawan; Leonardo Ybañez alyas Romeo, taga Caduawan; ug si Warren Cañas, 13-anyos, taga barangay Mangase sa lungsod sa Tabogon.

Samtang ang mga nangaangol mao sila si Elena Tulid; Maylord Omonares; Marsing Binabay; Bellano Tul-id; Enda Ybañez; Merlinda Masong; Jeslie Tul-id; Teresa Tuling; Jonel Tul-id; Eugene Sumayang; Leo Amigable; Jason Cogal; Julie Ann Puebla; Maria Billy Puebla; Irene Monesit; Rudy Monesit; Michelle Sumayang; Kayan Tuling; Ging-ging Amigable; Gilbert Cogal; Benjie Tul-id; Ruth Albuno; Perla Abayon; Danica Abayon; Juven Puebla; Jhares Ybañez; Violeta Ornopia; Edgardo Escaña; Ailene Motalbo; Loreta Manalic ug ang pito ka mga menor.

Ang drayber sa cargo truck nga mi-overtake naila nga si Norman Monteron, 25, molupyo sa barangay Mangase sa Tabogon.

Samtang ang drayber sa trak nga natagak sa pangpang nailhan nga si Juvy Pedrano, 27, molupyo sa barangay Caduawan sa lungsod sa Tabogon, bugtong nga si Monteron ra maoy gitanggong sa karsel sa kapolisan.

Si PO3 Epifanio Comedido, imbestigador sa maong aksidente nga nahinabi sa Banat News miingon nga ang mga biktima gikan pa sa ilang balay luwan sa maong cargo truck aron ihatod sa katubhan diin sila motrabaho sa sitio San Antonio, barangay Binabag sa dakbayan sa Bogo.

Sumala pa ni Comedido, nga mga mananapas og tubo ang mga biktima ug human unta nila og trabaho kagahapong adlawa makakobra na kini sa ilang sweldo.

Base sa imbestigasyon ni Comedido, mi-overtake ang trak nga gimaneho ni Monteron sa tungasong bahin sa maong dalan apan dunay kalit nga gikasugat nga motorsiklo maong misuway kini pagbalik sa lane apan nabag-iran niini ang gisakyan sa mga biktima. Kini maoy hinungdan nga nisarasay ang maong trak ug natagak sa pangpang nga may gihabugong kinse metros (45 ka tiil).

Tulo ang nadat-ogan sa maong trak ug patay diha-diha dayon samtang ang mga residente nga nakabantay sa maong hitabo daling mitabang sa mga biktima nga mipadala kanila sa tambalanan.

Unom niini ang gipadala sa tambalanan sa dakbayan sa Sugbo tungod sa kagrabi sa angol nga ilang naangkon.

Ang sagad sa mga nabiktima sa maong aksidente pulos usab mga biktima sa bagyong Yolanda nga naningkamot nga mabalik sa normal ang ilang kinabuhi pinaagi sa pagbalik og panarbaho.

Si Comedido mibutyag nga ang amahan sa nakalas nga si Juvelyn Puebla,  mitug-an kanila nga nanarbaho sila aron mapabarog pagbalik ang nagusbat nilang balay tungod sa bagyo.

Gawas kang Puebla, naangol sa maong aksidente ang iyang inahan ug mga igsuon nga buot usab manarbaho sa katubhan.

Ang tag-iya sa katubhan nga gitrabahoan sa mga biktima nga si Manuel Dy mipasalig nga atimanon ang panginahanglan sa iyang mga trabahante, sumala pang Comedido. (BANAT NEWS)