388 ka classrooms di na magamit sa Northern Cebu

CEBU, Philippines - Adunay 388 ka mga classrooms sa nagkadaiyang  lugar sa  amihanang bahin sa Cebu ang pwerteng gubaa tungod sa super typhoon Yolanda ug dili na gyud magamit.

Matud pa ni Arden Monisit, ang DepEd-Cebu Provincial Schools Division superintendent nga mao kini ang resulta sa assessment sa mga DepEd engineers atol sa ilang pag- inspection sa mga status sa mga school buildings o classrooms sa maong dapit.

Sumala pa ni Monisit ang mga classrooms nga nangaguba naa nahimutang sa munisipyo sa Sogod, Borbon, Tabogon, Medillen ug San Remegio. Ang mga engineers mupahigayon pa og inspection sa Daan Bantayan ug sa Bantayan island karong semanaha.

Nagkanayon si Monisit nga iyaha nang gipahibalo ang maong sitwasyon  kang DepEd Secretary Armin Luistro  kinsa mianhi sa Cebu kagahapon.

Samtang ang mga mayor sa Daanbantayan ug mga lungsod sa isla sa Bantayan nagkahiusa sa ilang hukom sa pagsuspenso sa ilang klase sud sa usa ka bulan o depende sa pagbangon sa maong mga lungsod gikan sa trahedya.

Matud pa ni Daanbantayan Mayor Agusto "Itok" Corro kasagaran sa mga tunghaan sa iyang lungsod ang naguba ug dili na kini magamit.

Wala usab sila’y magamit nga mga covered court ug mga dagkong punoan sa kahoy nga kasamtangang kapasilungan sa mga tinun-an kay lakip kini sa giharos sa  kabangis sa bagyo.

Samtang si Mayor Ian Cris Escario sa Bantayan island mipadayag nga dili una siya motugot nga mobalik ang klase sa mga bata hangtud di malimpiyohan ang mga tunghaan.

Samtang si Sta. Fe Mayor Jose Esgana mibanabana ngadto sa 300 milyones ka pesos ang danyos sa mga tunghaan ug 300 milyones ka pesos sa imprastraktura sa maong lungsod.

Gumikan niini nanghinaut ang tulo ka mayor nga mahatagan sila og igong pagtagad sa national nga kagamhanan ug sa probinsiya sa Sugbu sa ilang subling pagbangon sa ilang nasinating trahedya. (BANAT NEWS)