Meeting de avanse gipabuthan bungkag

CEBU, Philippines - Nabungkag ang meeting de avanse sa usa ka pundok nga magpapili sa  eleksyon ugma dihang gipabuthan sila sa upat ka wala mailhing mga lalaki sa covered court sa barangay Inayawan sa alas 9:50 sa miaging gabii.  

Nagpa-blotter sa Pardo Police Station si Gilbert  Abellanosa usa ka kandidato  pagka-konsehal sa barangay.

Matud  pa  niya  nga samtang nagpahigayon siya ug ang iyang mga kauban og meeting de avanse adunay upat ka mga lalaki ang kalit lang nagpabuto maayo na lang  kay  walay naigo.

Si Rodrigo Ocampo nga nahinabi sa The Freeman/Banat News nga milansar isip kapitan sa barangay Inayawan miingon nga nabungkag gyud ang ilang gipahigayon nga kalihokan.

Si Ocampo miingon nga init gyud ang dagan sa politika sa ilang lugar apan wala hinuon niini nganli kun kinsa ang responsable sa maong insidente. Matud pa ni Ocampo nga si Loche Amor Ponce  nga milansar isip konsehal ang nagdiskurso niadtong panahona nga gipabuthan sila sa upat ka mga lalaki.

Miingon  siya  nga nakit-an pa gayud niya mismo ang duha ka mga lalaki nga mitira sa ilang pusil sa yuta ug sa atop sa covered court.

Hinuon  dili  kini  maila  kay  pulos  nagtap-tap sa nawong ug nagsul-ob og kalo ug dali  kaayo nga mipalayo  sa maong  lugar  human sila makapabuto sa ilang  armas  de fuego. 

Ang hepe sa Pardo Police Station nga nahinabi sa Banat News nga si Zaldy Gokotano miingon nga iyang ipasusi  ang maong taho.  (BANAT NEWS)