Driver gitabanga’g patay sa 3

CEBU, Philippines - Namatay diha-diha  ang  usa ka lalaki samtang  naangol ang  kauban  niini human tabangi og pusil sa tulo ka  wala  hiilhing  kriminal didto sa Ermita Proper, sa barangay Ermita, dakbayan sa Sugbo kagahapon sa alas 9:30 sa buntag.

Ang namatay naila nga si Alexander Tura, 46, driver  sa  trisikad, minyo, ug molupyo sa maong barangay.

Samtang ang  naangol naila nga si Raymond Morales, 29, negosyante, ug molupyo    usab sa  Ermita.

Si Morales  giingong  naglakaw  usab  niadtong  higayona  nga  dili  layo  ni Tura.

Matud  pa  sa mga  nakasaksi  sa hitabo  nga  nasabak  si  Morales  sa saag  nga mga  bala  nga  mipisik  didto  kaniya.

Samtang  si  SPO1 Ruth Violango sa Homicide Section sa  kapolisan  sa Cebu City  Police  Office (CCPO) nga nahinabi sa Banat News nagkanayon nga samtang naglakaw sa dalan ang biktima kuyog sa iyang asawa nga si Liezel Tura ug iyang anak nga lalaki didto sa Ermita Proper,  kalit kining gipusil  sa tulo ka mga lalaki  nga nag-atang  kanila  sa maong  lugar.

Nakaangkon ang  biktima og pipila ka samad pinusilan sa iyang lawas nga maoy hinungdan sa hinanaling kamatayon niini.

Naigo sab sa iyang tuong tuhod ug sa walang tiil si Morales nga daling gidala sa Cebu City Medical Center.

Human sa maong  pagpamusil, milayas  dayon  gikan  sa maong  lugar  ang  mga  kriminal pinaagi  sa pagpanagan  niini  pahilayo  sa maong  dapit. Miingon si Violango nga naka-ila ang asawa sa biktima sa mga lalaki nga mipusil sa  iyang  bana.

Iya kining  gihinganlan nga sila si Michael, Ramboo ug Opaw.

Sumala pa ni Violangon nga dihang gikahinabi niya ang asawa sa biktima miingon  nga gisugo ang iyang bana sa pagpatira (pagpatay) og tawo nga utangan kanila (mga suspek).

Wala usab maklaro kun unsa nga utang apan nagtuo si Violango nga may kalabotan kini sa drugas.

Miingon si Violango nga basi sa pamahayag sa asawa sa biktima  nga wala mosugot ang biktima nga siya ang motira,  busa   siya na hinuon ang gipatay.

Napunitan  sa kapolisan didto sa crime scene ang pito ka kabhang sa kalibre .45  nga  pistola ug 4 ka mga  bala.

Padayon ang imbistigasyon sa kapolisan aron masikop ang tulo ka mga lalaki nga responsable sa maong krimen. (BANAT NEWS)