Comendador out, Gillamac in
CEBU, Philippines - Sugod kagahapong adlawa, aduna nay bag-ong hepe sa kapolisan sa Cebu Provincial Police Office human sa kapin duha ka tuig nga pagdumala ni Sr. Supt. Patrocinio Comendador.
Gihulipan sa katungdanan si Comendador ni Sr. Supt. Noel Gillamac nga kanhi hepe sa Mandaue City Police Office ug kanhi hepe usab sa Human Resources and Personnel Division sa Police Regional Office.
Atol sa pagbiya ni Comendador iyang panghinaot ngadto kang Gillamac nga padayunon niini kun unsay iyang nasugdan ilabi na ang pag-monitor sa kaso ni Ellah Joy Pique, ang 6-anyos nga batang babaye nga gilabay diha sa lungsod sa Barili niadtong buwan sa 2011.
Ang amahan ni Ellah Joy nga si Reynante, tuyo gyud nga mitambong sa maong seremonyas aron iyang ma-estorya si Comendador kinsa mao gyu’y nagtabang kanila aron magmalampuson ang ilang kaso.
Matud pa ni Reynante nga aduna siya’y gibating kabalaka sa iyang pagkasayod. Iya nalang nga itugyan ngadto sa bag-ong hepe sa CPPO nga maoy motabang kaniya aron masulbad ang kaso sa iyang anak. Samtang si Gillamac sa iyang habig mipasalig usab nga iyang padayunon ang tanang programa nga nasugdan ni Comendador alang sa kapolisan. Dako usab ang pagsalig ni Gov. Hilario Davide III ngadto kang Gillamac nga padayunon niini ang mga maayong nahimo ni Comendador.
Si Comendador anha ibutang sa Police Regional Office samtang nagpaabot sa pagbalhin kaniya ngadto sa kaulohan. (BANAT NEWS)
- Latest
