Patay’ng bata naglutaw gituohang pasahero sa barko

CEBU, Philippines - Usa ka patay  nga  batang  lalaki  nga gibana-bana  nga  nagpangidaron  og  usa ka tuig  nabangalan  sa usa  ka  mananagat  didto  sa kadagatan  sa Cordova    kagahapon  sa kaadlawon.

Si SPO2 Danny Alboro  sa kapolisan sa maong lungsod miila  sa nakabangal  nga  si Tomas  Licanda Bawe, 29, minyo  nga taga  barangay  Pilipog, Cordova.

Matud  ni SPO2 Alboro  nga ang nahisgotang mananagat wala na lamang mopadayon sa iyang pagpanagat nga maoy naandan niining gihimo sa matag gabii  human  niya  hisayri   nga  nalunod ang barko nga St. Thomas Aquinas sa 2GO Shipping.

Miingon si SPO2 Alboro nga mitabang na lamang ang nahisgutang mananagat sa pag-aninaw sa kadagatan nga nahimutang duol sa nalunoran sa maong barko sa pamasin nga aduna pay buhi nga pasahero nga magpanawag sa pagpangayo’g  panabang.

Dugang pa ni Alboro alas 11:00 pasado ang takna sa gabii sa  pag-aninaw sa maong mananagat sa kadagatan hangtod nga  nakita  niini ang patay’ng lawas sa batang lalaki nga nagsul-ob og diaper.

Dali nga gikuha sa maong mananagat  ang  bata ug gikarga sa iyang sakayan  dayon  gipahibalo  niini ang mga tinugyanan sa St. Francis Funeral Homes sa dalan Natalio Bacalso Avenue sa dakbayan sa Sugbo. Si SPO2 Alboro miingon nga dako ang ilang pagtuo nga ang maong patay’ng lawas sa batang lalaki  usa sa mga pasahero sa nalunod nga barko.

Nagtuo si SPO2  Alboro nga kuyog ang ginikanan sa maong bata nga pasahero sa nalunod nga barko nga wala pa matino kun naluwas ba sa maong trahedya.  (BANAT NEWS)