POEA mi-warning fixer bantayan sa mga aplikante’g trabaho sa gawas
CEBU, Philippines - Mipasidaan ang Philippine Overseas and Employment Administration (POEA) sa mga Pinoy nurse nga nangita og trabaho sa gawas nga magbantay tungod sa mga fixer nga nagtanyag og tabang sa posibleng trabaho sa Germany.
Matud pa ni POEA Chief Hans Cacdac, nga nakadawat sila og impormasyon nga adunay mga fixer nga misaad sa ilang mga aplikante nga iapil ang ilang ngalan sa listahang isumite ngadto sa Germany bugti sa salaping ibayad.
Dugang pa ni Cacdac, ang mga illegal recruiter, scammer ug fixer kasagarang pahimuslan ug ipublikar alang kuno sa kahigayonan sa panarbaho didto sa gawas.
Pipila niini mao ang kahigayonan sa mga trabaho nga napublikar sa Employment Permit System sa Korea, nga naglakip sa mga nurse ug caregiver sa Japan ug karon sa Germany’s Triple Win Program na usab.
Maoy hinungdan nga ang mga opisyal sa POEA dinhi sa rehiyon miawhag sa mga aplikante nga nurse nga magbantay ning maong matang pagpangaplay. Gitataw ni Cacdac nga ang mga aplikante pilion base sa ilang kwalipikasyon ug dili sa salapi.
Giingong ang Federal Employment Agency (FEA) pinaagi sa International Placement Services (IPS), usa ka awtorisadong ahensya nga nag-recruit og mga Pinoy health professionals ubos sa German law, maoy katapusang magdesisyon sa pagpili sa mga aplikante.
Mihatag og abeso si Cacdac sa mga nangita og trabaho sa ubang nasud nga mo-report sa ilang buhatan sa mga "fixer" nga ilang masugatan ilabi na kun nahilambigit ang mga empleyado sa POEA.
Mahimong motawag sa mga numerong 722-1144 ug 722-1155, mag-email sa [email protected] o motaho sa ilang Facebook: facebook.com/poea.official ug Twitter: twitter.com/poeaNews. (BANAT NEWS)
- Latest
