OIC chief sa Talisay police naniid pa
CEBU, Philippines - Ang bag-ong officer-in-charge sa Talisay City Police Station (TCPS) sa pagkakaron naniid pa sa sitwasyon sa siyudad.
Si Superintendent Resty Santos nga nahinabi sa Banat News nagkanayon nga bag-o pa lang siyang milingkod isip OIC sa TCPS ug sa pagkakaron ang mga pamaagi una sa iyang napulihan nga si Superintendent Elmer Lim ang iyang sundon sa pagmentenar sa kahusay ug kalinaw.
Usa sa maong mga pamaagi mao ang aggressive patrolling diin adunay mga polis nga kanunay’ng magpatrolya sa kadalanan ug adunay mga magpahigayon usab og checkpoint.
Gibutyag ni Santos nga base sa talaan sa Cebu Provincial Police Office (CCPO) ang Talisay adunay taas nga gidaghanon sa krimen ilabi na sa mga insidente sa tulis hinungdan nga gipapadayon niya ang aggressive patrolling ug checkpoint sa kadalanan.
Kahinumdoman nga ang kapolisan sa dakbayan sa Talisay nakadakop og mga suspetsadong tulisan atol sa gipahigayon nila nga checkpoint. Ang bag-ong OIC sa TCPS buot usab kining mohangyo sa kagamhanan sa siyudad nga tabangan silang makapatukod og laing police sub-station.
Tumong niini mao nga ang mga polis mahimutang sa duol nga lugar ug makaresponde dayon ngadto sa lugar diin adunay mahitabong krimen.
Usa sa lugar nga buot butangan ni Santos ug sub-station mao ang barangay Bulacao nga boundary sa dakbayan sa Sugbo.
Si Santos kinsa kanhi hepe sa Danao City Police Station milingkod isip OIC sa TCPS niadtong Hunyo 27, 2013.
Samtang ang kanhing OIC sa TCPS nga si Lim mao usab ang gipuling OIC karon didto sa Danao City Police Office. (BANAT NEWS)
- Latest