Mangingilad nadakpan sa polis

CEBU, Philippines - Nasakmit ang kalibre .38 gikan sa usa ka tawo nga gituohang sakop sa budol  gang sa dalan F. Ralota sa barangay Poblacion, dakbayan sa Danao   sa miaging  hapon.

Ang suspetsado nga nadakpan mao si Rodel Angot, 29, ulitawo, nga lumad nga taga Tandag, Surigao del Sur, ug temporaryong nagpuyo sa barangay Jubay sa lungsod sa Liloan.

Mao  usab  kini  ang  gisuspetsahang  miilad  sa usa  ka babaye  sa wala pa  kini  hidakpi.

Si SPO2 Ildefonzo Prosia sa kapolisan sa dakbayan sa Danao nga nahinabi sa Banat News miingon nga unang midangop sa ilang buhatan ang biktima sa pagpangilad sa budol nga si Myrna Ramos, 48 , dalaga nga usa ka magpapatigayon sa barangay Poblacion sa maong dakbayan.

Dugang pa ni SPO2 Prosia nga kauban sa maong dinakpan ang usa ka lalaki nga giila lamang niyang  taga  dakbayan sa Davao sa pag-ilad sa biktima kansang  cell phone, laptop ug pitaka  nga adunay salapi nga wala matino ang kantidad  maoy gisakiyo  sa maong  mangingilad.

Sa  imbistigasyon   sa kapolisan  nasayran  nga gibilin sa maong dinakpan  ang bag nga giingong puno sa kuwarta.

Unya  aron kunohay  mosalig  sila sa  biktima  nga  dili  hilabtan   niini  ang  kuwarta  nga  gisulod  sa bag, gidala  niya  ang    cell phone, laptop,  ug  ang  bag  sa biktima  nga may  kuwarta.

Milakaw  kini  nianang  alas  10:00  pa  sa buntag  ug hangtud  sa pagka-alas 4:00  sa hapon  wala  na  gyud  mobalik.

Maoy  hinungdan  nga  midangop  ang  biktima  ngadto  sa kapolisan.

Matud pa ni SPO2 Prosia nga nasigpatan ang  suspetsado sa biktima kinsa  positibo  niining giila nga maoy nag-ilad kaniya.

Ang  suspetsado nga nakamatikod sa mga polis nga kuyog sa biktima nag-iyahay  og panagan apan ang suspetsado nga si Angot maoy nagunitan sa mga polis ug nadakpan.

Gisakmit  dayon  sa  mga otoridad   ang  armas  nga kalibre 357 niini  nga  adunay duha ka magazine nga puno sa bala, nagkalainlaing ID, ATM, pitaka nga adunay sulod nga P1,500 ug cell phone sa biktima.

Gitanggong karon sa  bilanggoan sa kapolisan sa maong dakbayan ang maong suspetsado ug  ang kauban nga giila lamang  nga  Nino maoy   padayon nga gipangita. (BANAT NEWS)