CEBU, Philippines - Naugdaw ang duha ka mga pabrika nga nahimutang sa usa ka compound sa barangay Tabok, dakbayan sa Mandaue sa sunog alas 6:52 ang takna kagahapon sa buntag nga nakontrolar sulod sa 15 minutos nga pagpawong niini.
Tulo ka tawo usab ang giingong nangapaso lakip na niini ang usa ka Chinese national nga nagtrabaho sa maong pabrika nga si Zou Xing Dong ug duha pa ka kawani, hinuon dili grabe ang ilang nahiagumang paso.
Ang nasunog nga pabrika mao ang Marzel Marketing Limited ug Mars Foam Manufacturing Corporation nga gipanag-iya sa magpapatigayon nga Anthony Dy sa maong dakbayan.
Si SFO1 Julius Lua, imbestigador sa kabomberohan sa maong dakbayan nga nahinabi sa Banat News miingon nga padayon pa ang imbestigasyon pagtino sa sinugdanan sa sunog.
Sa inisyal nga pagbanabana, mokabat sa P250,000 ang kantidad sa danyos sa sunog. (BANAT NEWS)