BOC misakmit sa 149 ka cell phone

CEBU, Philippines - Pormal na nga gisakmit sa Bureau of Customs (BOC) ang gipalusot nga 149 units nga China cell phone nga nakompiskar sa mga sakop sa BOC-Sub Port of Mactan ug sa Philippine Center for Aviation Security (PCAS) 7 sulod sa Mactan Cebu International Airport (MCIA) sa milabay’ng buwan. Si Customs Sub-Port of Mactan Collector Atty. Paul Alcazaren mipadayag nga ang maong mga cell phone gidala kini sa lima ka mga Chinese nationals nga mosakay unta sa abyon padung sa kaulohan sulod sa MCIA departure area niadtong  Abril 29, 2013.

Ang mga nakuhaan sa mga pinayuhot nga cell phone mao si Pan Zushou, Pan Kelun, Pan Qinhai, Chen Zhike ug Huang Wentie, pulos  mga  hingkod, ug mga  Chinese nationals. Nasakmit  gikan  sa maong  mga suspek ang 149 ka mga China made cell phone ug mga accessories niini sulod sa ilang tagsa-tagsa ka  mga  traveling bag diin gikatahong gikan sa dakbayan sa Sugbo, ilang  gikompra ug dad-on ngadto sa kaulohan  aron  adto didto nila ibaligya.  Matud pa ni Collector Alcazaren ang mga suspek nakalapas sa RA 8293 sa Intellectual Property Rights (IPR) diin tanang mga “imitations” kinahanglan nga kumpiskahon. Sa taho ni Lt. Reynaldo Lascota, ang Sector Commander sa Customs Police sa Sub-Port of Mactan ngadto ni Customs Police District Commander Maj. Camilo Casculan Jr., kini  mipadayag nga gitugyan ngadto kanila ang maong mga cell phone gikan sa PCAS 7 alang sa pagkustodiya   niini.

Sa samang higayon  gitugyan  usab  kanila  ang  pagpasaka og kaso batok sa mga Chinese nationals. Human sa imbentaryo   sa maong  mga cell phone  nga gihimo ni BOC Examiner Roy Gonzaga ug Appraiser Elmar Carniser sa milabay’ng adlaw, nasuta nga nakalapas sa RA 8293 ang maong mga ebidensiya nga nakumpiskar sa mga tinugyanan  sa BOC. Ang Sub-Port of Mactan miluwat  dayon  og Warrant of Seizure and Detention (WSD) sa maong mga kargamento ug gihikay na ang kasong ipasaka batok sa mga Chinese nationals. (BANAT NEWS)