Boxing trainer gipatay
CEBU, Philippines - Patay ang usa ka kanhi boksidor nga nahimong boxing trainer sa ALA Gym human kini gipusil sa silingan nga giingong nalambigit sa illegal nga drugas diha sa Centro- Labogon sa dakbayan sa Mandaue sa miaging gabii.
Ang namatay mao si Louie “Kamaong Mandaue†Bantigue, 28, molupyo sa maong dapit nga kanhi bantamweight boxer ug karon usa na ka boxing trainer sa ALA-Gym. Samtang ang gitumbok nga mipatay kaniya mao si Danilo Pepito alyas Boyaks ug usa ka naila lang sa pangalang Boboy nga giingong usa usab ka drug personality sa dapit sumala pa sa kapolisan.
Matud pa sa nakasaksi nga si Ricky Elba nga nag-inom silang duha ni Bantigue ug niadtong tungora mopalit unta sila og dugang ilimnon ug sigarilyo.
Sumala pa niya diha ang suspek sa tindahan nga dunay gidalang bag nga itom ug nagtan-aw sa nagsugal, samtang nanuktok ang biktima sa tindahan kalit nga milipot ang suspek diha sa luyo sa biktima ug walay daghang pasangil gipusil niini si Bantigue.
Diha na nagkatibulaag og panagan ang mga sugarol ug sa iyang pagsusi sa higala nag-ubo na kini ug naglunang sa dugo. Ang biktima giingong nakaangkon og mga samad pinusilan sa likod nga bahin ug sa bukton.Ang asawa sa biktima nga si Adelina, mipadayag usab nga nag-away ang biktima ug ang suspetsado sa milabay’ng semana ug gibaharan kini sa suspek. Ang hepe sa Basak Police Station, Sr. Insp. Wilson Abot, sa pakighinabi sa Banat News miingon nga anaa sa ilang drug watchlist ang mga suspek.
Gisubay pa kung unsay motibo sa pagpamusil, wala usab kompirmaha sa kapolisan ang report nga gipasanginlan ang biktima nga nangawat og halok sa anak sa suspek maong nagkaaway silang duha. Base sa http://www.fightsrec.com/ si Bantigue dunay 50 ka professional fights sa record nga 21-22-7 (W,L,D) sa wala pa siya moretiro.
Si Bantigue adunay duha ka mga gagmay pa nga mga anak nga nag-edad og 7, 8, ug nagsabak og unom ka buwan ang iyang asawa. (BANAT NEWS)
- Latest
