Sunog sa Subangdaku 1 angol

CEBU, Philippines - Naugdaw ang duha ka commercial type nga edipisyo ug usa ka  balay   sa usa  ka  sunog  nga mihugpa didto sa dalan Hernan Cortes Avenue sa barangay Subangdaku, dakbayan sa Mandaue sa alas 8:15 ang takna sa buntag kagahapon nga miangol  sa usa ka 6 anyos nga batang lalaki.

Ang naangol mao si Kervy  John Gastardo nga anak ni Romeo Gastardo,  nga  tag-iya sa balay nga nasunog  kilid  sa upholstery shop niini.

Si SFO3 Cefriano Codilla, imbestigador sa kabomberohan sa maong dakbayan mibutyag  nga nagsugod ang kayo sa upholstery shop ni Gastardo ug dali kaayo  kining mitapon ngadto sa commercial type nga edipisyo  nga gipanag-iya nila ni Nicolas Ouano ug Wenifredo Escoto.

Dugang pa niya nga duha ka balay nga gipanag-iya nila ni Roly Bengong ug Estephane Aledria  igo  lang  nakan-an  sa kayo  kay napawong  dayon  kini  sa mga  bombero.

Matud pa ni SFO3 Codilla nga ilang gipaubos sa second alarm ang maong sunog nga  nakontrolar sulod sa 10 minutos ug  gibanabana nga mokabat sa P60,000 ang gibilin nga danyos niini.

Ang kuryente sa upholstery shop ni Gastardo maoy ilang gituohan nga maoy hinungdan sa pag-ulbo sa kayo

Ang  anak  niini nga  napaso  sa  kayo  gihatud  dayon  ngadto  sa Mandaue District  Hospital.

Sa nasayran alas 6:50 sa miaging gabii  mihugpa usab ang sunog sa Semense Compound sa barangay Tipolo sa maong dakbayan ug pito usab ka balay nga ginama sa light material ang naugdaw ug duha usab  ang  igo  lang gipahakan  sa kayo.

Ang kayo nagsugod  sa panimalay ni Concheta Bongo nga  gituohan  gihapong naggumikan  sa  kuryente nga nagbilin og danyos nga mokabat P120,000 apan walay gikatahong naangol atol sa maong hitabo. (/WC) (BANAT NEWS)