Ulitawo giluba patay sa driver

CEBU, Philippines - Namatay ang usa  ka  ulitawo  human  kini   dunggaba sa usa ka drayber  sa traysikol  didto sa National Highway, sa Poblacion East, lungsod sa Moalboal  sa milabay’ng adlaw.

Ang biktima giila sa kapolisan sa Moalboal nga si Wilson Santos, 21, taga  Cogon,  sa maong  lungsod, samtang ang suspek giila nga si Alberto Pocong, 40, ug molupyo sa Upper Tunga sa nahisgutang lugar. Sila  si  PO2 Stewart Bayang, PO2 Benedicto Rubia ug PO1 Arnold Sergio  sa Moalboal  Police  Station  kinsa  maoy  miresponde  sa hitabo  nagkanayon  nga  samtang  naglakaw sa  karsada  ang  biktima  uban  sa iyang  amahan  ug  ig-agaw, milabay  ang  traysikol  nga  gimaneho  sa suspek .

Unya  gihangyo  sa  biktima  nga  unta  librehon  lang  sila  sa plite  kay  wala  silay  kuwarta,  ug  mao  ra kadtoy  hinungdan  nga  mikulisiw  sa kasuko  ang  suspetsado  sa  pagtuo  nga  gibugal-bugalan  siya.

Diha-diha milanit  sa iyang  kutsilyo  ug  giluba makatulo  ka higayon  ang  biktima.

Pagkalup-og  niini  sa yuta  dali kaayong  milayas  ang  suspek  ug  gibiyaan  ang  biktima  uban  sa amahan  ug  ig-agaw  niini  nga naglunang  sa kaugalingong  dugo  sa karsada.

Sa pakighinabi sa Banat News kang PO1 Clodualdo Patriarca sa kapolisan sa Moalboal nasayran  nga   lasbag diay  kuno  sa alak ang  biktima  ug  ang  mga kauban  niini kay   gikan nga namista  sa lungsod  ug  malagmit  nagbugal-bugal  sa suspek.

Tungod  sa kakalit  sa hitabo  nahuwasan  ang  amahan  ug  ig-agaw  sa biktima  sa kahubog, apan  wala  silay  nahimo  paggukod  sa suspek.

Ang biktima kinsa  nakaangkon og duha ka samad dinunggaban sa dughan ug usa didto sa wala nga  hawak, ilang gidala sa Badian District Hospital, apan gideklarar   kining patay  na   sa doktor  sa  tambalanan. Padayon pa karong  gipahigayon  ang hot pursuit operation sa kapolisan sa Moalboal   batok  sa  suspetsado. (/WC) (BANAT NEWS)