Joavan di makalingkawas sa prisohan

CEBU, Philippines -  Magpabilin  sa prisohan  si  Joavan  Fernandez ,ang  popular  nga  anak ni Mayor  Socrates Fernandez sa dakbayan  sa Talisay tungod  sa kaso  nga  illegal possession of explosive  nga  iyang  giatubang  sumala  pa ni Talisay  City  Prosecutor  Marshal Rubia  kagahapon.

Matud  pa  ni Rubia  nga ang  kasong  Illegal  possession  of firearms   ug  paglapas  sa Comelec  gun ban  nga  gipasaka  batok   kang Joavan  mahimong  kapiyansahan  apan  ang  kasong  illegal  possession  of explosive, usa  ka  non-bailable  nga  kaso  busa  dili makalikay  niini  ang    anak  sa mayor,  sumala pa ni Rubia.

Ang  maong  mga  kaso  gipasaka  sa  kapolisan  sa Talisay batok  kang  Joavan niadtong Martes   tungod sa giingong paghupot niini og   granada  ug pusil nga adunay mga bala.

Gibutyag ni Rubia nga P50,000 ang piyansa sa kaso  nga illegal possession of firearms ug P60,000 bahin sa kalapasan sa Comelec gun ban.

Human ikapasaka ang maong  mga kaso  batok ni  Joavan, gipaubos    dayon  kini sa inquest proceeding niadtong Martes.

Kagahapon matud ni Rubia giandam na nila ang information sa kaso ni Joavan aron  ihandos  ngadto sa korte.

Sa laing bahin, si Joavan nga nahinabi sa Banat News kagahapon sa buntag nagkanayon  nga  giandam  na usab niya  ang  iyang  piyansa   ug nag-agad  lang  siya  sa  iyang mga abogado.

Si Joavan   sa sayo  pa mipasangil kang Superintendent Elmer Lim, officer-in-charge sa Talisay City Police Station nga misukmag sa iyang nawong   human  siya  hidakpi.

Gawas niini  mipasangil usab siya  nga planted ang tanang ebidensiya batok kaniya.

Si Joavan midugang nga posibleng mopasaka siya og kaso batok sa mga polis apan gitun-an pa kini sa iyang mga abogado.

Si Lim sa iyang bahin nagkanayon nga atubangon nila ang tanang reklamo nga ipasaka batok kanila.

Midugang kini nga  igo lang silang mituman sa ilang katungdanan sa pag-implementar sa balaod. (BANAT NEWS)