Asset gitangkugo pagpusil patay

CEBU, Philippines - Patay diha-diha ang usa ka asset sa kapolisan human  kini pusila  sa tangkugo  ug  uban  pang  bahin  sa lawas sa   wala  hiilhing  mga kriminal  didto s a sitio  Lucon, barangay Poblacion sa lungsod sa Alegria kagahapon sa alas 6:00 pasado sa buntag.

Ang biktima  kansang  lawas  nabulit  sa mga  samad  sa  bala   nga  maoy namatyan  niini  diha-diha mao si Oliver Ong, 41, ulitawo  nga adunay kapuyo,   nagpuyo  sa maong  lugar ug asset sa kapolisan sa kampanya batok   sa gidiling drugas sa maong lungsod.

Sumala  sa  mga saksi , duha ka mga lalaki nga hingkod ang panuigon   nga wala  hiilhi  maoy  nagtinabangay pagpusil  sa biktima.

Si SPO1 Renato Abellar,  imbistigador sa Alegria Police  Station   mibutyag  sa Banat News   ang  duha ka kriminal  daan  na  nga  nag-atang   sa atbang  sa balay  sa biktima  sa  sayong  kabuntagon.

Dihang  migawas  na  ang  biktima  sakay  sa iyang  motorsiklo  mipaduol  usab  dayon kaniya  ang  mga  kriminal.

Apan  tungod  kay  malagmit  nakaila  siya  sa maong  mga  kriminal,  mikanaog  siya  sa iyang  motor  ug  midagan balik  sa ilang  balay.

Apan  wala  na  siya  makaabot  didto  kay  nalup-og  siya    dihang nasabak  ang  iyang tangkugo  ug  uban  pang  bahin  sa lawas  sa  mga  bala  sa duha  ka armas  sa  mga  kriminal  nga  nagdungan  sa  pagpusil    sa  biktima.

Samdan  usab ang  biktima  sa   iyang  buko-buko, abaga, tuhod  nga  maoy  nakapahagba   niini  sa koral  sa ilang  balay.         

Ang  mga  kriminal  kinsa  nakasiguro  sa  tino  nga  kamatayon  sa biktima  dali kaayong  nakaikyas  ug  nakapahilayo  sa maong  lugar.

Ang mga polis nga mirespondi  maoy  mikonpirmar  sa kamatayon  diha-diha  sa   biktima.

Ilang  gitutokan  karon  ang motibo  nga  may  labot  sa   pagka-asset  nila  sa   biktima  kinsa  gituohan nilang  daghang  mga  negosyante  og  shabu  sa maong  lugar nga  nagdumot  niini.

Padayon  nilang  gipanid-an  ang  mga kriminal  karon. (BANAT NEWS)