9 anyos nadasmagan sa multicab kritikal

CEBU, Philippines - Talandugon  ang kahimtang    sa 9 anyos nga batang lalaki human kini dasmagi   sa usa  ka  multicab sa iyang paglabang  sa highway sa barangay San Roque sa lungsod sa Ginatilan   sa miaging  Domingo  sa hapon.

Ang biktima mao si Mike Gabriel Singco, 9, nga  molupyo  sa  maong  lugar.

Samtang ang drayber sa multicab kolor puti dunay     plaka nga YGF-522, mao  si Alden Jay Batino, 19, ulitawo,  nga   nagpuyo sa Mancao Subdivision sa barangay Valladolid,  siyudad sa Carcar.

Si SPO1 Romeo Carcedo sa Ginatilan Police Station  mibutyag  sa  Banat News  nga ang multicab gikan  sa lungsod sa Samboan paingon sa amihanang bahin nga dereksiyon.

Apan  sa  pag-abot   niini sa maong lugar tungod sa kadaghan sa tawo   kay pista  man  sa maong  dapit  sa maong higayon, wala  mabantayi  niini  ang  biktima kinsa  kalit lang  milabang  sa karsada  busa  nalagpot  kini  sa daplin.

Dali kining gitabang  sa  mga tagtungod  ug gidala  ngadto  sa M.J. Cuenco District Hospital sa lungsod sa Malabuyoc  apan  gi-transfer  usab dayon  kini sa tambalanan  sa dakbayan sa Sugbo.

Samtang ang drayber sa multicab nga si Batino bulontaryong mitahan  ngadto  sa kapolisan apan wala  kini matanggong  og  dugay  sa prisohan  kay  nakig- areglo kini sa mga kabanay   sa biktima ug mipasalig  nga  siya’y  moabaga  sa galastohan  sa ospital. (BANAT NEWS)