Smuggler og sakyanan priso

CEBU, Philippines - Nagtingkagol sa karsel ang usa ka dealer sa sakyanan   human   masakmit  sa mga sakop sa Criminal Investigation and Detection Group (CIDG) ang dul-ang 20   niya  ka mga sakyanan nga  pinayuhot.

Ang nasikop mao si Gary M. Lapinid, 57, giingong tag-iya sa GML Auto Dealers Spareparts Co., Ltd, nga nahimutang sa Rabaya St., San Roque, dakbayan sa Talisay.

Ang  pagkasikop  sa  maong  suspek  nahimo human  ang sakop sa CIDG-7 nakadawat og taho kalabot sa usa ka 40-footer van nga   kargado  og  mga sakyanan nga gidiskarga  sa GML Auto spareparts  Dealer Co. nga nahimutang sa Rabaya street.

Tungod sa maong taho, daling mikuha og search warrant ang kadagkoan sa CIDG-7 gikan  ni RTC Br 19 Judge Wilfredo Fiel Navarro.

Pasado alas 4:00  kagahapon sa kaadlawon, gisilbi dayon  nila  ang  maong  search warrant ug didto ilang nasakmit ang duha ka unit sa Mitsubishi Colt; usa ka unit sa Suzuki Swift; upat ka unit sa Toyota BB; usa ka Toyota Yaris; usa usab ka Toyota Colt; laing usa ka Toyota RUNX; Honda Mobilio ug unom ka unit sa Nissan Cube.

Sa pakighinabi sa Banat News ni Sr. Supt. Eddie Benigay, ang hepe sa kapolisan sa CIDG-7 mipadayag kini nga ang ilang nasakmit mga smuggled car nga gipalusot sa dakbayan sa Talisay.

Matud pa ni Benigay nga nakadawat sila og taho kalabot sa mga pinayuhot  nga  mga  sakyanan  nga  anha  ibutang sa  shop  ni  Lapinid hinungdan nga gipanid-an  kini  sa mga  operatiba  sa CIDG  ug  nasuta  nila  nga  kini  positibo.

Miingon  si  Benigay nga ipadayon nila  ang pagmonitor sa mga  pinayuhot  nga  mga  sakyanan  dinhi  sa lalawigan  sa Sugbo  ug  gusto  nilang  mahurot  og  sikop  ang  mga smuggler  aron  dili  na maglabad  ang  ilang  ulo.

 Kasamtangang  gibalhog sa karsel sa CIDG-7 ang dinakpan samtang nagpaabot kini sa tukmang kaso nga ipasaka batok kaniya. (WC) (BANAT NEWS)