3 ka carnapper sikop

CEBU, Philippines - Nasikop sa kapolisan  kagahapon ang tulo ka espesyalistang carnapper og  mga Starex Van dinhi sa dakbayan sa Sugbo.

Ang  nagtingkagol   karon  sa prisohan  mao  sila  si Raphael Montilla alyas Raprap  ug  ang  duha  ka  Korean national  nga  sila  si  Kim Jae Young alyas Leo Lim ug Hong Seo Yong alyas Luis kansang  address wala  pa  maklaro. Ang  pagkasikop  sa tulo  nahimo  pinaagi  sa hiniusang  paningkamot  sa mga  sakop  sa  Regional Intelligence Division, Regional Special Operations Group ug Investigation Detection Management Branch sa Mandaue City Police Office kinsa mi-monitor pag-ayo niining  pagkaylap  sa carnapping  sa Metro Cebu areas.

     Human  masikop  ang  mga s suspetsado nasakmit  sa  mga  kapolisan  ang siyam ka mga Starex Van nga gi-abandonar diha sa may dalan A. S. Fortuna ug Cabancalan, syudad sa Mandaue  gikan  niadtong Enero  ning tuiga  hangtud  niining  buwan  sa Pebrero.

Matud pa sa hepe sa RSOG, nga si Chief Insp. George Ylanan nga tungod sa nakuha  nilang  impormasyon gikan  kang Montilla  nga maoy  una  nilang  nasikop  human  kini  maka-carnap  og duha  ka Starex Van nasikop  usab  nila  sila  si  Kim  ug  Hong.

 Ang duha ka  Koreano maoy giingong tigbaligya sa mga sakyanan nga kinawat.

Matud pa ni  Hong nga ang iyang kaubang Koreano nga si  Kim  maoy responsabli sa pagpangawat sa mga Starex Van, ug  siya maoy  silbing dealer niini  ug  si Montillo mao usab ang mangita og mopalit sa kinawat nga sakyanan.  Sa  imbistigasyon  sa kapolisan si Kim   mikompisal  nga  duha pa lang siya ka bulan nga misulod sa maong kalihukan.

Nasakmit  gikan sa duha ka mga Koreano ang nagkadaiyang tools nga gamiton sa pagkawat sa sakyanan lakip na ang daghang yawe sa Starex ug ginadiling drugas uban  sa mga  drug paraphernalia.

Pipila  sa  gikawatan  og  Starex Van mao  ang magtiayong Karla ug Ramon Fernandez, usa ka  sikat  nga basketbolista.

Nawagtang  ang  ilang  sakyanan niadtong Enero 19 ning tuiga nga gani  nakita  sa CCTV camera sa ilang subdivision  ang hulagway sa Koreano nga nadakpan,  uban sa laing tawo nga wala pa hiilhi.

Ang hepe sa kapolisan sa Police Regional Office Chief Supt. Marcelo Garbo mibutyag nga ang pagkasakmit sa maong  mga  sakyanan ug pagkasikop sa tulo ka  mga  kawatan ug sakyanan timailhan lang nga ang kapolisan wala  matulog.

Unang nakuha sa kapolisan sa IDMB Mandaue ang lima ka Starex Van nga gi-abandonar  didto  sa maong  dakbayan, samtang gisundan usab kini sa laing  duha  nga  nasakmit  sa RSOG  kagahapon sa buntag ug  laing  Starex Van  ang  ilang  nakuha  didto  sa Tabunok, dakbayan  sa Talisay. (BANAT NEWS)