2 nalubong buhi

CEBU, Philippines - Nalubong buhi ang duha ka lalaki human kini mataklobi sa ilang gikubkob nga yuta didto sa barangay Cagcagan, lungsod sa  Poro, isla  sa Camotes sa miaging buntag.

Ang nalubong buhi mao sila  si EliseoTindog Gubalane, 59, ug Mandy Estrera alyas Tata, 30, nga pulos molupyo sa maong barangay.

Sa pakighinabi sa Banat News ni SPO1 Rey Jaron sa Poro Police Station nasayran nga ang duha ka biktima uban sa laing duha niini ka kauban nagkubkob og yuta nga guiso aron i-abono sa bag-ong  gitukod  nga  balay.

Matud pa ni SPO1 Jaron nga ang anak ni Gubalane maoy nagpatukod og  balay nga diin  gamiton  ang  gikubkob nga guizo.

Dugang pa ni SPO1  Jaron nga samtang nagkubkob og yuta ang duha ka biktima giingong kalit lang nga midahili ang ibabaw  niini ug  mitabon kanila.  Ang duha ka kauban sa biktima daling nakadagan pahilayo sa maong lugar ug maoy nangayo og tabang ngadto sa kapolisan.

Gibana-bana ni SPO1 Jaron nga adunay 150 ngadto na sa 200 ka tiil ang gilawmon sa gikubkob  nga lungag sa duha ka biktima.

Gibutyag  usab  ni SPO1 Jaron nga niana nang  alas 12:00  sa udto naugkat ang patay’ng lawas sa  mga biktima.

Gani, gigamitan  kini  og payloader  sa  pag-ugkat  gumikan  sa kalawom  sa lungag  nga  ilang  nahimutangan.

Samtang ang anak ni Gubalane, nakurat  sa  nahitabo  kay  wala  siya magdahum  nga  ang  iyang  amahan miapil  sa  pagkubkob sa  yuta  nga  unta  nanuhol man siya og  mga  tawo  nga  motrabaho sa  iyang  balay.

Midugang  si SPO1 Jaron nga ang duha ka kauban sa biktima wala na makahulagway pa og tarong ngadto kanila sa nahitabo tungod usab sa  hilabihang  kabalaka  sa kakalit   sa  nahitabo. (BANAT NEWS)