Tulo ka City Hall employees positibo sa drug test

CEBU, Philippines -  Ang Cebu City Office of Substance Abuse Prevention (COSAP) sukad pa niadtong Lunes mipahigayon og drug test sa 360 ka mga kawani nga naggikan sa nagkalain-laing buhatan sa Cebu City Hall.

Ang resulta sa drug test sa sobra 200 ka mga kawani pending pa kini apan usa ka kawani nga gikan sa Cebu City Sports Commission ang gidudahang tiggamitan og ginadiling drugas tungod kay positibo ang resulta niini sa drug test.

Si Jun Reyes, COSAP Executive Director nagkanayon nga kadtong mga positibo sa drug test giisip nga mga suspetsadong drug users samtang wala pa ang resulta sa confirmatory test.

Ang kagamhanan sa siyudad nagmatngon karon sa ilang “terminologies” human sa confirmatory result sa 16 ka mga traffic enforcers nga gipaubos sa drug test sa milabay’ng tuig nga nagpamatuod nga dili kini mga drug addict.

Si Mayor Michael Rama nagkanayon nga ang maong mga personnel posibleng nakasinati og trauma sa maong insidente tungod kay nahulga kining mataktak sa ilang trabaho base sa resulta sa drug test.

Ang nahisgutang 16 ka mga personnel ang gi-hired pagbalik sa City Traffic Operations Management (CITOM).

Ang mga kawani nga napaubos sa drug test sukad niadtong Lunes mao ang naggikan sa buhatan sa Anti-Mendicancy Board, City Agriculture Office (CAO), Cebu City Sports Commission, Department of Engineering and Public Works, Building Maintenance Services (BMS) ug Office of the Building Official.

Sa pito ka mga kawani sa Anti-Mendicancy board ug 42 sa agriculture personnel wala’y mga nagpositibo sa drug test.

Apan usa sa sports commission ug duha sa BMS ang gidudahang tiggamitan og ginadiling drugas tungod kay milikay nga mapaubos sa drug test.

Mokabat sa 196 ka mga kawani sa DEPW ug 34 sa OBO ang napaubos sa drug test gipaabot pa ang resulta niini. (BANAT NEWS)