Lalaki gibulit og bala sa ulo

CEBU, Philippines - Patay nang nakit-an nga dunay samad pinusilan sa ulo ang usa ka drayber sa habal-habal nga nagbuy-od sa karsada ug gituohang biktima sa salvaging  diha sa barangay road sa barangay Sangat sa lungsod sa San Fernando niadtong Miyerkules sa alas 3:50 sa hapon. Ang biktima mao si Richard Allosa Canoy, 40, molupyo sa maong lugar.

Matud ni SPO2 Victor Cuyno, desk officer sa San Fernando Police dihang nahinabi sa Banat News usa ka Neil Faith Lapuz ang nakadiskubre sa biktima nga nagbuy-od daplin sa dalan nga naglunang sa kaugalingong dugo ug wala nay kinabuhi.

Sa pagsusi sa kapolisan sa patay’ng lawas aduna kini mga samad pinusilan sa ulo nga maoy nakaingon sa hinanali niya nga kamatayon. Usa ka kabhang sa kalibre .45 nga armas ang na-recover sa kapulisan gikan sa crime scene.

Anggulo sa gidiling drugas ang gisubay karun nga motibo sa kremin sa nagpadayong imbistigasyon human nakahipos og inpormasyon ang kapulisan nga nalambigit sa kalihukan sa gidiling drugas ang biktima.

Gani dunay report nga mamaligyaay og gidiling drugas ang biktima gawas sa iyang pagsilbing habal-habal drayber hinuon kining tanan gikompirmar pa sa padayong imbestigasyon.

Hinoon matod ni SPO2 Cuyno nga duna na silay lead karun kun si kinsa ang mamumuno, usa sa motibong ilang gisubay mao ang kalambigitan sa illegal nga drugas. (/EIM) (BANAT NEWS)