Gisuyaan kay maayo mosayaw giluba angol

CEBU, Philippines - Kritikal ang kahimtang sa usa ka bayong- bayong human kini dunggaba sa bukobuko   kay  gisuyaan samtang  nagsayaw sulod diskohan   sa Sitio Latid, barangay Bato siyudad sa Toledo kagahapon sa alas 12:40 sa sayong kaadlawon.

Ang biktima mao  si Paulo Sumilhig, 17, ulitwo ug   molupyo sa nahisgutang lugar.

Samtang  ang  suspek mao si Jember Gentapa, 21 , ulitawo,  nga  taga Sitio Talisay,  sa mao gihapong barangay.

Si PO3 Roxam Enerio sa Toledo City Police Station mibutyag  sa Banat News  nga  ang biktima   kinsa  misayaw sa  diskohan  uban  sa iyang  mga  barkada  kalit  lang  gidunggab  makaduha  ka  higayon  sa buko-buko.

Gumikan  sa  kakalit  sa  hitabo  nagkaguliyang ang mga naniskohay  ug hinuon  nadakpan dayon  ang  suspek  sa  miresponding mga  polis.

Samtang ang biktima gidali pagdala sa Toledo City District Hospital apan gi-transfer dayon  kini sa VicenteSotto Memorial Medical Center (VSMMC).

Gituohan nga nasuyaan ang biktima gumikan  sa kaayo  mosayaw  niini  ug  nalingaw  kaayo  ang  mga  barkada  niya. (Darrel A. Carumba/WC) (BANAT BALITA)