Negosyante gipatay

CEBU, Philippines - Gipusil sa makadaghang higayon ug namatay ang usa ka negosyante nga nanag-iya og dagkong tindahan ug botika sa lungsod sa Balamban sa iyang paggawas sa pinuy-anan  aron unta mag-jogging diha sa Barangay Sta. Cruz sa Balamban kagahapon sa alas 5:40 sa buntag.

Ang biktima nga patay nang nadangat sa tambalanan mao si Victor Awit Mapa, 62, byudo, nagpuyo sa maong lugar ug negosyante sa maong lungsod.

Duha ka mga lalaki nga nagsakay og motorsiklong kolor blue nga nag-angkasay maoy gitumbok sa mga saksi nga responsable sa krimen.

Matud ni PO2 Godofredo Dumdum sa Balamban Police Station dihang nahinabi sa Banat News nga mao pay paggawas sa biktima sa gate sa ilang balay dihang kalit kining gisugat sa usa ka lalaki ug gipaulanan og bala.

Nagduda ang kapolisan nga nag-atang nang daan ang mga gikatahapan sa paggawas sa biktima nianang mga orasa.

Human sa pagpamusil mibalik sa nagpaabot nga kauban ang gunman ug miikyas luwan sa motorsiklo ngadto sa wala pa matinong direksyon.

Ang biktima gisuwayan pagdala sa mga kabanay sa Balamban District Hospital sa lungsod apan patay na kini. Giingong nakaangkon kini og lima ka samad pinusilan sa lawas.

Ang kapolisan nakapunit og lima ka basiyo sa bala nga kalibre .45 ug usa ka slugs nga gituohang gikan sa armas sa gunman.

Base sa gihimong pagsusi sa mga imbestigador  nakakita kini og lalis sa caretaker sa iyang yuta ang biktima pipila na ka adlaw ang milabay. Gikatahong nasuko ang biktima nga nang-harvest og lubi ug kahoy ang maong caretaker apan wala bahina og sakto ang halin.

Ang kapolisan mitutok karon sa maong insidente nga posibleng maoy motibo sa krimen apan wala usab isalikway ang uban pang posibleng anggulo. (/EIM) (BANAT NEWS)