Kasadya sa Downtown Colon gibuksan na sad
CEBU, Philippines - Gibuksan na usab sa miaging gabii ang Kasadya sa Downtown 2012 hinungdan nga gisugdan na usab ang night market nga isip kabahin sa maong kalihukan kung diin nagkadaiya nga mga baligya ang ipang-display diha sa dalan Colon gikan sa alas-6 sa gabii hangtud na sa alas-2 sa kaadlawon.
Suma pa sa presidente sa downtown revitalization project nga si George Chiu nga mao na kini ang ikawalo ka tuig sa Kasadya sa Downtown diin baratong mga paninda ang gitanyag sa night market.
Dugang pa ni Chiu nga makatabang usab kini alang sa mga gagmay nga negosyante nga makapamaligya sa ilang mga produkto. Ubay-ubay na usab ka mga kalihukan ang giandam sa kagamhanan sa Siyudad sa Sugbo alang sa Kasadya sa Downtown kung diin usa na niini ang pagbutang og mga musikero sa matag eskina sa Colon nga magsilbing panaygon.
Ipahigayon usab karong Nobiyembre 28 ang heritage walk kung diin ang tumong niini ang paghatag og importansya sa kasaysaysan sa Colon.
Busa butangan og mga parol ug series lights ang maong dalan aron sadya kini nga lantawon.Samtang si Mayor Michael Rama mipadestino na og mga polis, barangay tanod ug mga volunteers aron maseguro ang kalinaw sa maong kalihukan. (BANAT NEWS)
- Latest
