Polis nanigbakay tiklo

CEBU, Philippines - Usa ka polis kauban sa siyam ka  mga sugarol nadakpan sa kapolisan human maaktohi nga namusta sa tigbakay atol sa Adlaw sa mga Santos didto sa sitio Maghaway sa barangay Marigondon sa dakbayan sa Lapulapu.

Ang lakip sa nadakpan ug mikagulkol sa prisohan mao si PO3 Artemio Tumakay, hingkod  nga sakop sa intelligence section sa kapolisan sa lungsod sa Consolacion. Mga  kauban  ni PO3 Tumakay mao sila si  Nestor Amodia, 42, Gabriel Aton, 48, Rolando Catadman, 44, Florencio Amores, 56, Lino Aton, 40, Domingo Aton, 52,  Roy Potot, 37 ug  Conrado Potot, 59 ug pulos molupyo sa maong dapit. Si PO2 Neeron Ivan Sarzuelo sa kapolisan sa Presinto 4 nga nagbase sa barangay Marigondon nga nahinabi sa Banat News miingon nga sayo niini nakadawat  sila og taho gikan sa pipila ka molupyo sa maong dapit kalabot sa gipasiugdahang tigbakay sa maong dapit. Dugang pa niya nga ang ilang hepe nga si Inspector Juan Capacio ug mga sakop  niini maoy mironda sa maong  illegal  nga  sugal. Si PO2 Sarzuelo miingon nga pagdasmag  sa team sa kapolisan  ngadto  sa nagtampunsisok nga mga sugarol  may  naka-alinggat  kanila busa mikabad dayon  kini og  panagan apan  ang  siyam  nga nagyampungad  sa nag-away  nga  mga  manok  nga naglakip kang PO3 Tumakay  wala makadagan nga maoy hinungdan  sa ilang  pagkasikop.

Nasakmit sa kapolisan  ang duha ka manok nga gitaoran pa og tari, laing manok nga igtatari ug salapi nga P220 nga gituohan sa kapolisan  nga  pusta  sa  mga sugarol. (/WC)(BANAT NEWS)