CEBU, Philippines - Buhaton ni incumbent Cordova Mayor Adelino "Addy" Sitoy ang tanang legal nga lakang makanselar lang ang kandidatora sa negosyanteng si Rex "Wakee" Salud nga modagan pagkamayor sa lungsod sa Cordova.
Si Sitoy sa pakighinabi sa Banat News mibutyag nga mosumitir siya ngadto sa Comelec-Manila og petisyon aron kanselahon ang kandidatora ni Salud base sa desisyon sa korte nga nagdili sa maong negosyante nga makakandidato tungod sa isyu sa diin kini magpuyo.
Lakip sa legal nga lakang nga himuon unya ni Sitoy mao ang pagpasaka og kasong perjury batok kang Salud ug disbarment case batok sa mga abogado niini gumikan sa wala nila pagtahod sa korte.
Apan si Atty. Fillmore Gomos sa iyang bahin kinsa nahinabi sa Banat News nagkanayon nga wala mahulga sa mga lakang ni Sitoy gumikan kay aduna usab silay gikuptang mga dokumento nga naghatag og katungod sa ilang kliyente (Salud) nga makadagan sa pagkamayor sa lungsod sa Cordova.
Naglaraw usab si Sitoy sa pagkuha og mga artista nga ikasakbang batok sa mga manok ni Salud atol unya sa ilang mga kampanya sa lungsod sa Cordova.( /EIM)