CEBU, Philippines - Usa ka kriminal kinsa dugay na nga gi-wanted sa kapolisan sa lungsod sa Medellin, nasikop human manghasi atol sa pista sa Upper Tabok, dakbayan sa Mandaue sa miaging kaadlawon.
Ang suspetsado mao si Benjur dela Cruz, 30, ulitawo, nga nailhan sa iyang mga kauban sa trabaho sa construction nga si Jerry dela Cruz nga taga taga Lumintac Sur, Carmen, Cebu.
Si SPO2 Danilo Barrita sa kapolisan sa Presinto 3, sa dakbayan sa Mandaue nga nahinabi sa Banat News miingon nga ilang nadawat ang tawag sa usa ka nagpakabanang molupyo sa maong dapit kinsa mireklamo kay gihasi sila sa suspetsado kinsa lasbag kaayo sa bino sa alas 3:00 ang takna sa kaadlawon.
Dugang pa ni SPO2 Barrita nga si Senior Inspector Wilson Abot, hepe sa kapolisan sa Prisento 3 sa Mandaue City Police Office (MCPO) maoy misikop sa suspetsado ug mibalhog niini sa detention cell gumikan sa paglapas sa ordinansa nga nagdili sa paghubog-hubog sa mga publikong lugar.
Dihang giimbestigar nila ni Senior Inspector Abot nagdumili kini sa pagtug-an sa tukmang address didto sa Medellin nga nakapatahap sa kapolisan.
Hinungdan nga nakahukom sila sa pagtawag sa buhatan sa Medellin Police Station diin didto nila masuta nga usa diay sa mga most wanted kriminal sa maong lungsod ang maong suspetsado.
Nasayran nga kasong murder ang giatubang nga kaso sa maong suspek nga natala sa Branch 61 sa Regional Trial Court (RTC) 7 sukad pa niadtong tuig 2005.
Ang suspetsado gikatakda nga kuhaon sa mga sakop sa kapolisan sa lungsod sa Medellin karong semanaha. (/WC) (BANAT NEWS)