CEBU, Philippines - Nasikop sa kapolisan ang duha ka kawatan nga nagtago sa exhaust room sa usa ka fast food chain sa usa ka mall sa barangay Mabolo, dakbayan sa Sugbo pasado alas 10 sa buntag kagahapon.
Ang mga nasikop mao sila si Jetson Sueles, 31, ug usa ka bayong-bayong nga 17-anyos nga pulos molupyo sa syudad sa Naga.
Si PO2 Reynaldo Labating, imbestigador sa Theft and Robbery Section sa Cebu City Police Office mibutyag sa Banat News nga ang manager sa Jolibee nga si Dennis Roldan Bacus maoy nakakita sa suspetsado.
Diha-diha mitawag si Bacus og security hinungdan nga nasikop ang duha ug gidala ngadto sa SM Security Department.
Dihang gihinol ang mga lawas nila nasakpan sa mga bulsa niini ang P157,104 nga gituohang iya sa Jolibee.
Matud pa ni Labating nga ilang nasayran nga gikuha sa mga kawatan ang kwarta gikan sa vault sa maong fast food chain niadto pang Sabado sa gabii. Midugang siya nga wala na kini makagawas sa maong higayon busa gipaabot nila ang pag-abli sa mall kagahapon sa buntag, dihang nasakpan sila sa ilang nahimutangan.
Gihulagway ni Labating nga ang estelo sa duruha, klaro kaayo nga pulos na mga hanas sila sa pagpangawat busa gisubay nila karon kun aduna ba kini laing mga biktima.
Hangtod sa pagsuwat ning balita, padayon pang giimbistigar sa kapolisan ang mga suspetsado samtang gisusi usab nila ang Naga Police Station bahin sa background niining tawhana. (/WC) (BANAT NEWS)