Eddiegul agdon sa mga mayor

CEBU, Philippines - Gibutyag ni Kongresista Eduardo Gullas sa unang distrito sa probinsiya sa Sugbo nga ang tanang mayor sa unang distrito mag-agad kaniya kinsay angay nilang paluyohan nga mga kandidato sa umaabot nga piniliay.

Sa gipahigayong press conference sa kongresista sa iyang buhatan sa University of the Visayas wala malikayi ang pangutana kung kinsay iyang suportahan isip gobernador sa lalawigan sa Sugbo nila ni Pablo John Garcia sa One Cebu Party ug Hilario Davide III sa Liberal Party.

Apan ang kongresista mipadayag nga ang duha ka mga kandidato pulos suod niya busa maglisud siya sa pagbutyag kinsa ang angay niyang paluyohan ug ang iyang desisyon maoy agdon sa mga mayor sa iyang distrito

“One thing I sure, ang   mga mayor mag-agad na nako, kung unsa na sila ron gumikan nako…., I’ve been silent, mag-agad na sila..for example Carcar and Naga ma siyudad ba na sila kung di pa si Edigul?”, matud sa kongresista.

Apan wala pa ibutyag sa kongresista atol sa press conference kung kinsa nilang duha ni Garcia ug Davide ang iyang suportahan.

Apan matud niya nga mibisita kaniya sa iyang buhatan sila si Gobernador Gwendolyn Garcia uban sa manghud niining si Kongresista   Pablo PJ   Garcia ug ang ilang amahan nga si Kongresista Pablo Garcia.

Samtang si Davide nakigkita sa iyang anak nga si Gerald Anthony “Didi” Gullas.

Matud ni Gullas nga si Didi ug Davide suod kaayo tungod kay classmate sila kaniadto gikan sa prep hangtud pagkahuman sa elementary. Ug gawas niini gibutyag sa kongresista nga suod usab sila ni kanhi Chief Justice nga amahan ni Davide. Apan matud sa kongresista nga kung unsa ang ilang pagsuporta sa gobernadora niadtong tuig 2010 sama gihapon karon. Si Gullas kinsa mikompirmar nga modagan isip mayor sa Talisay gikatakdang moduso sa iyang Certificate of Candidacy (COC) karong Oktubre 5, 2012 sa alas 8:00 sa buntag sa buhatan sa Comelec- Talisay. (/WC) (BANAT NEWS)