CEBU, Philippines - Mokabat sa 200 ka mga lider sa barangay ug urban poor gikan sa North District ning dakbayan sa Sugbo ang gipaabot nga mosalmot sa membership seminar sa Partidong Demokratikong Pilipino (PDP) Laban dinhi sa Sugbo karung umaabot nga Biyernes, Septiyembre 28, 2012. Ang mga kadagkoan sa PDP Laban gikan sa kaulohan maoy nakahan-ay nga mga guest speaker sa maong kalihukan nga ipahigayon sa usa ka iladong hotel dinhi sa dakbayan.
Si Dr. Marlo Maamo ang gituboy nga kandidato sa PDP Laban sa pagka-kongresista sa north district maoy mi-request sa partido sa pagpahigayon og membership seminar sa 200 ka mga barangay leader ug urban poor leader nga gustong mag-pamiyembro sa partido. Ang mga urban poor leader nga musalmot sa seminar sakop sa Urban Poor Solidarity Federation (UPSFED) nga una nang mipahibawo sa ilang suporta kang Dr. Maamo.
Ang pagpahigayon og membership seminar proseso kini sa partido sa dili pa mo-take oath isip lihitimong sakop. Sa milabay’ng semana si Dr. Maamo pormal nga nanumpa isip sakop sa PDP Laban atubangan ni PDP Laban President Aquilino “Koko” Pimentel sa usa sa mga iladong kan-anan dinhi sa dakbayan. Matud ni Dr. Maamo nga wala siya mahulga niining pagpahibawo na sa kompletong line-up sa Team Rama ug Bando Osmeña Pundok Kauswagan (BOPK) sa tanan nilang mga kandidato sa umaabot piniliay.
Matud pa niya nga andam siyang moatbang nila ni kanhi kongresista Raul Delmar kun mobalik kini og lansar nga kandidato sa BOPK party ni Kongresista Tomas Osmeña samtang ang talent manager nga si Anabelle Rama ang kandidato usab ni mayor Micheal Rama. WC (BANATNEWS)