Alay Lakad gisalmotan sa kaliboang tawo

CEBU, Philippines - Kaliboan ka mga tinun-an sa high school ug kolehiyo lakip na ang mga kawani sa gobiyerno ug mga nagkalainlaing ahensya niini ang misalmot sa "Alay Lakad 2012" kagahapon sa buntag sa dakbayan sa Lapulapu.

Atol sa maong tinuig nga kalihukan, si Lapulapu City Mayor Paz Radaza mihagit sa mga batan-on sa pagpakatap sa mga maayong kalambuan ug kahimtang sa dakbayan sa Lapulapu pinaagi sa "social media" nga maoy gikabuangan sa mga batan-on karon.

Ang mga maayong kalambuan sa dakbayan sama sa natad sa turismo, patigayon ug ang mga kultura niini maoy angayang ipakatap sa mga batan-on ngadto sa mga internet, facebook, twitter ug uban pang matang sa social media nga maabot sa atong henerasyon karon.

Matud niya nga dako og ikatabang ang mga batan-on kun ikapakita nila ngadto sa ilang mga higala sa ubang kanasuran ang bahin sa mga maayong kalamboan sa Lapulapu ug uban pang bahin sa lalawigan kay usa kini ka paagi nga ma-engganyo ang mga langyaw sa pagbisita dinhi sa nasud ilabi na sa dakbayan sa Lapulapu.

Alang sa mayor ang pagpahigayon sa "Alay Lakad" matag tuig dili lamang alang sa mga opisyales sa kagamhanan kundi alang usab sa mga out of school youth diin maoy mahimong benepisyaryo sa maong kalihukan.

Mituo si Radaza nga ang kabataan maoy dakong paglaum sa umaabot nga henerasyon ug gumikan niini angayan kining suportahan sa ilang pagtuon.

Ang mga out of school youth kinahanglan usab tudloan sa mga programa alang sa ilang trabaho nga masudlan aron may panginabuhian sila bisan wala sila makalampos sa pagtuon.

Matud pa ni Radaza daghan na sa mga out of school ang ilang natabangan sa pagpalambo sa ilang kinabuhi pinaagi sa mga programa sa dakbayan sa Lapulapu. (BANAT NEWS)