15-anyos gipusil sa agtang samtang nahinanok

CEBU, Philippines – Patay nang napalgan sulod sa usa ka multicab ang usa ka 15- anyos nga lalaki human kini gipusil gamit ang armas nga gituohang may silencer diha sa sitio Gabi, barangay Gun-ob sa dakbayan sa Lapulapu kagahapon sa buntag. Ang biktima residente sa Marigondon sa dakbayan sa Lapulapu nga mamunitay og basura.

Matud pa ni Insp. Zenaido Pastorfide sa alas 4:30 kagahapon sa kaadlawon dihang pagpukaw sa mga kaubang libudsuroy ang bata wala na kini makamata pa ug dihang ilang gisusi nagkadugo na ang ulo niini. Sa pagresponde sa kapolisan nasuta nga adunay samad pinusilan sa iyang agtang ang bata ug may usa ka basiyo sa kalibre 45 nga bala nga nakuha diha sa crime scene.

Usa ka 16-anyos nga lalaking kauban sa biktima ang mipadayag nga kanunay silang matulog sa maong multicab matag gabii kay duol ra kini sa usa ka junkshop nga ilang baligyaan sa ilang mga nahipos nga scraps.

Walay nadungog nga buto sa armas ang mga kauban sa biktima ingon man ang mga namuyo sa lugar.

Usa ka minor usab nga kauban sa grupo sa biktima ang mibutyag nga nakabantay kini nga may duha ka tawong luwan og motorsiklo nga miduol sa multicab ug mipusil sa natulog sa maong sakyanan apan wala kini makadungog og buto sa armas.

Nagtoo ang kapolisan nga may silencer ang armas sa killer sanglit wala makadungog og buto sa armas ang mga polis sa Station 3 nga 600 metros gikan sa nahitaboan.

Ang kapolisan padayon pang naghipos og mga ebidensya ug pamahayag pagtino sa motibo ug pagtumbok kinsa ang mga mamumuno. Hayan makasohan usab ang drayber sa multicab nga si Efren Matiliano human kini mipakanaog sa patay’ng lawas sa biktima bisan wala pa mahuman sa mga polis ang pag-imbestigar. (EIM) BANAT NEWS