CEBU, Philippines - Gibalhug sa prisohan ang duha ka lalaki kinsa nasakpan sa akto nga nagsuwat-suwat gamit ang pintal sa bongbong sa bag-ong merkado publiko sa dakbayan sa Mandaue kagahapon sa tungang gabii.
Ang mga suspetsado mao sila si Boeing Cabante, 18, ug 16 anyos nga kauban niini nga pulos taga sitio Sangi, sa barangay Gun-ob, dakbayan sa Lapulapu. Si PO2 Earl Fomador sa kapolisan sa Presinto 1 nga nagbase sa barangay Centro sa Mandaue mibutyag sa Banat News nga ang nakasakop sa mga suspetsado mao ang duha ka market guard nga sila si Jonathan Martinez ug Jenifer Cuizon nga pulos nagpuyo sa maong dakbayan.
Dugang pa ni PO2 Fomador nga nasikop ang duha samtang nagsuwat-suwat kini sa bongbong sa merkado sa alas 12:00 pasado ang takna sa tungang gabii kagahapon atol nga nag-roving sila si Martinez ug Cuizon sa palibot sa merkado.
Dali nga gisakmit sa maong mga guwardiya ang lata sa pintal nga gigamit sa mga suspetsado paghugaw-hugaw sa bongbong sa merkado ug gitunol dayon nila kini ngadto sa kapolisan.
Gitanggong karon sa sulod sa detention cell sa kapolisan sa maong dakbayan ang duha ka dinakpan aron pasakaan og sumbong nga paglapas sa anti loitering ordinance sa kagamhanan sa maong dakbayan. (/WC) (BANAT)