71 anyos nadasmagan sa motorsiklo angol

CEBU, Philippines - Padayong giatiman sa mga doktor ang 71 anyos nga lola human kini dasmagi og motorsiklo sa iyang paglabang sa karsada sa barangay Poblacion lungsod sa Barili niadtong Huwebes sa hapon.

Ang biktima mao si Conception Ewican, 71, nga taga barangay Patupat, lungsod sa Barili.

Samtang ang drayber sa Yamaha Vega motorcycle nga may plaka nga 7959-GU mao si Richard Onglao, 25, ulitawo, nga taga barangay Campangga sa mao gihapong lungsod.

Si PO3 Heinie Aspera sa Barili Police Station mibutyag nga ang biktima gikan nga nangompra sa merkado sa wala pa ang hitabo.

Samtang milabang na ang biktima paingon sa ilang balay dala ang iyang kinompra gikan sa merkado wala siya makabantay sa nagbaguros nga motorsiklo hinungdan nga tungod sa kakusog sa dagan niini nasabak gyud ang biktima.

Pagkatumba niini napantok ang ulo sa sementadong karsada busa gitabang dayon sa mga tawo ug gihatod ngadto sa Barili District Hospital apan gipabalhin usab dayon   ngadto sa Vicente Sotto Memorial Medical Center (VSMMC).

Samtang ang drayber sa motorsiklo boluntaryo usab dayong mitahan sa iyang kaugalingon ngadto sa kapolisan sa lungsod diin tua siya magtingkagol. ( WC) - BANAT NEWS